Creata in 2018, Spartimusica hè una struttura chì hà per scopu di ligà a ghjente cù a cultura. Piazzata trà a piazza di u mercatu è u fronte di u mare, ripresenta un locu cunnisciutu da assai mondu in u rughjone bastiacciu. Ghjè un associu creatu à partesi di a lege generale di l’associi fatta in 1901, è face parte di u pianu culturale messu in piazza da a cullitività di Corsica. Hè categurizatu cum’è laburatoriu culturale è empie parechji caratteristichi à u livellu culturale.

Prima di tuttu, u scopu di Sparti hè d’insignà a musica. Quì, truvarete tutti i generi di musica, di u tradiziunale sin"à a varietà, passendu pà corsi di Dj. Cù i numarosi strumenti messi à a dispusizione di l’elevi, pudarete truvà corsi di ghitarra, bassa, cetera, viulinu, piano, batteria, è di Dj. Ci hè dinù a pussibilità d’amparà u cantu cù parechji prufessori chì anu tutti una specialità ; u cantu tradiziunale, u cantu di varietà, u liricu, è ancu a tecnica vucale. Ogni prufessore di a squadra hè diplumatu ò hà seguitatu un parcorsu musicale prufessiunale. Quist’annu, per a prima volta, ci hè dinù corsi per i ciucci cù u svegliu musicale tutti i sabbati. In più di u latu musicale, ma sempre in giru à l’insignamentu, l’attellu d’amparera di teatru d’impruvisazione hè apertu per i zitelli u sabbatu, cù una ripresentazione à a fine di l’annu.

In un secondu pianu, Spartimusica cù a so sala di spettaculu, riceve assai ripresentazioni durante u mese. Per esempiu, tutti i marti sera, ci sò i “cabaret” fatti in cullaburazione cù a radiu RCFM. Tutti i primi sabbati di u mese, u comedy club colla annant’à a scena di Spartimusica per una ripresentazione dinù aperta à u publicu. D’altri evenementi sò spessi privisti, cum’è pezze di teatru ò prisentazione d’album da a parte di gruppi spessu scunnisciuti.

A sala principale di l’accolta permette dinù di riceve pitture d’artisti, chì venenu mette e so opere annant’à i muri durante un mese. Ci hè dinù a pussibilità di fà presentazione di libri di scrittori, ch’elli sianu scritti in corsu ò in francese per copre un latu più litterariu.

In fine, Spartimusica hè un locu d’accoltu per tutti l’artisti chì anu bisognu. U scopu hè di risponde à una dumanda culturale in u rughjone bastiacciu. Parechji strumenti fermanu sempre sopra locu. Ghitarre, piano, basse, viulinu, batterie è ancu d’altri sò sempre dispunivuli per quelli chì venenu à Spartimusica, ancu s’hè ghjustu per beie un colpu.

Per l’avvene, parechji prughjetti sò à mette in piazza. L’ughjettivu hè di sviluppà à u massimu l’identità di a struttura è ciò ch’ella pruponga.

U scopu maiò di l’associu ferma quantunque di fà di sta scola di musica una scola chì permette, à a fine, d’ottene un diplomu, sott’à a forma di grande scole di musica chì esistenu dighjà annant’à u cuntinente.